ജീവകാരുണ്യപഞ്ചകം

1              എല്ലാവരുമാത്മസഹോദരരെ-

                ന്നല്ലേ പറയേണ്ടതിതോര്‍ക്കുകില്‍ നാം?

                കൊല്ലുന്നതുമെങ്ങനെ ജീവികളെ-

                ത്തെല്ലും കൃപയറ്റു ഭുജിക്കയതും?

2              കൊല്ലാവ്രതമുത്തമമാമതിലും

                തിന്നാവ്രതമെത്രയുമുത്തമമാം

                എല്ലാ മതസാരവുമോര്‍ക്കിലിതെ-

                ന്നല്ലേ പറയേണ്ടതു ധാര്‍മ്മികരേ?

3              കൊല്ലുന്നതു തങ്കല്‍ വരില്‍ പ്രിയമാ-

                മല്ലീ വിധിയാര്‍ക്കു ഹിതപ്രദമാം?

                ചൊല്ലേണ്ടതു ധര്‍മ്മ്യമിതാരിലുമൊ-

                ത്തല്ലേ മരുവേണ്ടതു സൂരികളേ?

4              കൊല്ലുന്നവനില്ല ഭൂജിപ്പതിനാ-

                ളില്ലെങ്കിലശിക്കുക തന്നെ ദൃഢം,

                കൊല്ലിക്കുകകൊണ്ടു ഭുജിക്കുകയാം

                കൊല്ലുന്നതില്‍ നിന്നുമുരത്തൊരഘം.

5              കൊല്ലായ്കിലവന്‍ ഗുണമുള്ള പുമാ-

                നല്ലായ്കില്‍ മൃഗത്തൊടു തുല്യനവന്‍

                കൊല്ലുന്നവനില്ല ശരണ്യത മ-

                റ്റെല്ലാവക നന്മയുമാര്‍ന്നിടിലും.