ശിവപ്രസാദപഞ്ചകം
1 ശിവ! ശങ്കര! ശര്‍വ! ശരണ്യ! വിഭോ!
ഭവസങ്കടനാശന! പാഹി ശിവ!
കവിസന്തതി സന്തതവും തൊഴുമെന്‍-
ഭവനാടകമാടുമരുമ്പൊരുളേ!
2 പൊരുളെന്നുമുടമ്പൊടു മക്കളുയിര്‍-
ത്തിരളെന്നുമിതൊക്കെയനര്‍ത്ഥകരം
കരളീന്നു കളഞ്ഞു കരുംകടലില്‍
പുരളാതെ പൊതിഞ്ഞു പിടിപ്പതു നീ.
3 പിടിപെട്ടു പുരണ്ടുമറിഞ്ഞു പിണ-
ക്കുടിയില്‍ക്കുടികൊണ്ടു ഗുണങ്ങളൊടും
കുടികൊണ്ടു കുടിക്കുമരുംകുടിനീ-
രടിതട്ടിയകത്തു നിറഞ്ഞിരി നീ.
4 ഗളമുണ്ടു കറുത്തതു നീ ഗരളം
കളമുണ്ടതുകൊണ്ടു കൃപാനിധിയേ!
കളമുണ്ടൊരു കൊണ്ടലൊടൊത്ത കടല്-
ക്കളവുണ്ടൊരു സീമ നിനക്കു നഹി.
5 കനിവെന്നിലിരുത്തിയനങ്ഗരസ-
ക്കനി തട്ടിയെറിഞ്ഞു കരം കഴുകി
തനിമുക്തി പഴുത്തു ചൊരിഞ്ഞൊഴുകും
കനകക്കൊടിയേ! കഴലേകുക നീ.